حشى لولا عشر خصّك بها ربي عن الباقين
أبد ماكان من شافك .. تطيح الناس من عينه
دلع لين وشقار وخف دم ومخملية عين
خجل ملح وجمال وصدق هنا للي تحبينه
ظلمتي من يجي بعدك .. يجون وكنهم مقفين
قهرتي من يجي قبلك .. لو إنه شمس تخفينه
يغاير كوكب الأرض السما الدنيا متى تمشين
يقول إنه حظيظ اللي تواضعتي تدوسينه
ولو الله زوّج الشمس القمر ثم انجبوا نجمين
حشى ماجابوا اللي يشبهك نوره ولا زينه
بنفسج نرجس ونوار .. خزامى سوسن وياسمين
ربيعٍ ينبت بثغرك ترى لو ما تبلّينه
وأنا عني خلقت أسجد لـِ ربي وألتزم بـِ الدين
وأفكر كيف أسوي شي في دنياي ترضينه
أحبك وأعشقك وأحيا بحبك لين أقول آمييين
وليفٍ بالوفا والحب أنا اول من تعدينه
وعلى الكون الحرام إنه من أول خلقته للحين
أبد مازاره اللي يحاليك بـ موازينه
وحشى لولا حلاك اللي رفع قدرك عن الباقين
أبد ماكان من شافك يشوف الجنّه بـ عينه
|