مرت ايام ومريم على نفس الحال والكل في حاله صعبه يتريون مريم تصحا سلمان كان يدعي ربه انها تقوم بالسلامه .. وتمر الايام والساعات والدقايق
واخييييييرااااا يتسلل النور لعين مريم .. واخيرا فتحت عينها كان صعب عليها لانها ماشافت النور من 10 ايام .. واخيرا فتحت عيونها السودة الوسيعه كأنها طفل قعد من رقاده ..شافت خالاتها وعماتها حواليها حاولت تبتسم لهم ماقدرت مريم ماكانت تحس بالجزء الايسر من جسمها ماكانت تدري شنو السالفه حست بشعور غريب وخوف كبير وغمضت عيونها من الألم ماكانت تدري ليش تحس بهالعوار في جسمها وليش مو قاعده تحس بأطرافها ؟ شسالفه ليش مو قادره تحرك يدها ؟ يمكن من التعب !
في هالحظه قامت خالتها منار تتشهد وتحمد الله والكل كان يصيح دموع الفرحه شريفه كانت موجوده راحت عند مريم وحظنتها بقووه مريم كانت تطالع شريفه وكانت تكلمها بعيونها .. شريفه حست بمريم .. شلون ماتحس واهمه ربع من زمان مريم كانت تشكي وتحكي بعيونها ونزلت دمعه ساخنه على يد شريفه .. شريفه مسحت الدمعه وهمست لمريم
شريفه : خلاص حبيبتي لاتحاتين شئ .. اعرف انج تقصدين سلمان اانه راح اتصل فيه لا تحاتينه ..
* مريم حست بالراحه لانه شريفه فهمت عليها .. وبسرعه طلعت شريفه من الغرفه وراحت تكلم سلمان ..
تررن تررررررن
سلمان :الووو
شريفه : هلا اخووي شلونك ؟
سلمان : تمام منو معاي ؟
شريفه : انه شريفه
سلمان فز يوم سمع انها شريفه : هااا شريفه شفيها مريم لايكون صادها شئ شفيها ؟؟؟
شريفه : لا سلمان قول الحمدالله مريم صحت من شووي والحمدالله احسن
سلمان ماعرف شنو يسوي من الفرحه حمد ربه واستانس
سلمان : الله يبشرج بالخير يا اختي
شريفه : حاضرين اخوي
سلمان وصوته تغير : شريفه انه ابي اقول لج شئ
شريفه : خير سلمان شفيك ؟
سلمان : والله شاقول لج انه فكرت في موضوعي ويا مريم ولاحظت اني انه سبب كل المشاكل في حياتها وقررت اول ماتصحى مريم وتشفى ابتعد عن حياتها لاني ماستحمل اكون السبب في مأساة اللي احبها انه ضايع مادري شنو اسوي
شريفه قاطعت سلمان : لاااااا شنو هالكلام يا سلمان والله ماتوقعت منك سلمان انته اخر امل مريم متعلقه فيه .. اذا انت ابتعدت عنها خلااااص مريم بتضييييع تبي تذبحها ؟؟؟ قول لي تبي تذبحها ؟؟؟؟؟؟؟؟؟؟؟
** سلمان ماقدر يستحمل حس انه قلبه يتقطع واهو موعارف شنو يسوي
سلمان : شريفه ما ادري انه ضايع اخاف على مريم مابي يصيدها شئ
شريفه : لا سلمان لاتفكر جذي انته تحبها وخلك وياها لازم تدافع عن حبك وتوقف في ويه كل شئ .. مريم تحتاج لك لا تبعد عنها انته كل اهلها وكل ناسها
سلمان : الله يجبر بخاطرج شريفه والله للحظه انه يأست وقررت اسوي هالشئ عشانها بس انتي الحين ريحتيني وانشالله اقدر اسعدها واعدل كل شئ انه مابس شئ في هالدنيا غير راحتها وسعادتها الحين باخلي نوره وامي يزورون مريم عشان يتطمنون عليها نوره كل يوم تسألني عنها
شريفة : اوكي اخوي اخليك الحين باروح اشوفها
سلمان : اوكي اختي مشكوورة وايد ماقصرتي والله
شريفه : ماسوينا شئ يالله اخوي مع السلامه
سلمان : مع السلاامه
** وردت شريفه عند مريم وباتت عندها في المستشفى وتمر الايام والكل يزور مريم .. حالتها كانت تتحسن تكلمت وكانت تحس بالجزء الايسر بس كان صعب عليها تتحرك وايد بس كلها اسبوع ومريم عادت لطبيعتها بس النظرة الحزينه ماكانت تفارق عينها .. لانها مو عارفه شنو بيصير
واخيرا قرر الدكتور انه يرخصها ورفضت مريم انها تسافر بره لانها كانت تحس انها اوكي بس خالد عمها ماوافق وقال اذا ماتبين تسافرين للعلاج راح تسافرين عشان تغيرين جو مريم ابتسمت
خالد : شنوووووووو هالبتسامه لالا مابي انه زعلت ولا تسألين وين بتسافرين وويا منو ؟؟؟؟؟؟ يعني مو هامتج المفاجئه ؟؟؟؟؟؟
مريم : شنوو شسالفه ؟؟
خالد : راح تروحين لندن انه ويا خالتج منار بتروح تقعد ويا ريلها لانه اخر كورس له وبعد تدرين من بيروح ؟؟؟
مريم : من ؟
خالد : شريفه بتروح وياج كلمت ابوها ووافق بطلعة روح وافق عشانج انتي راح تقعدون اسبوعين تتشرون اغراض لانه حضرتج راح تداومين ..
مريم :اداوم ؟؟؟؟
خالد : ايي الجامعه انه سجلت اوراقج وتم القبول هههههه
مريم استانست من قلبها : صج واللله ؟؟؟؟؟؟؟ اي تخصص ؟؟
خالد : ادارة اعمال مثل ما كان ودج .. مو هندسة ديكور لانج كنتي تجاري
مريم ضمت عمها وباسته على راسه وقالت له الله لايحرمني منك
خالد دمعت عينه استانس انه قدر يسوي شئ عشانها
بس مريم فجأه اختفت البسمه من على ويها وقالت بصوت حزين
مريم : وعمي بوراشد ؟
خالد ابتسم : لااا لاتخافين خلاص مافي بوراشد خلاص ..
مريم : ليش شنو صار ؟؟
خالد : امممم الله يسملج خالج بوعلي ماقصر كلم بوراشد وبطلعة رووح وافق عمج انه يتنازل عن الوصايه عليج لانه خالج ماقصر وهدده بالفضيحه
مريم : اي فضيحه ؟؟؟؟؟؟؟
خالد واهو منزل راسه : للأسف يا مريم عمج العود طلع متورط في قضيه تزوير اوراق بس كالعاده طلع من السالفه تدرين عمج شخصيه مهمه وعنده وايد ناس ونفوذ الحمدالله محد عرف بالسالفه
مريم مستغربه : وخالي شدراه ؟؟
خالد : شلون شدراه مو خالج كان يتعامل مع شركة عمج
مريم : ايييه مسكين عمي الله يهديه ويساعده
خالد : ياطيب قلبج يامريم
مريم ابتسمت : مشكوور عمي بس انه الحين اذا عمي مو وصي علي وين اروح ! وحست بالغصه في حلقها والدموع تعلن نزولها
خالد : لالالالا مريم شفييييج .. شنو وين تروحين .. سمعي خالج بوعلي يبي يكلمج اهو ينطرج الحين تحت قاعد يخلص اوراقج روحي وياه وراح يقول لج كل السالفه افا عليج بس .. يالله فديتج يا احلى بنت مشي هالدموع
مريم ابتسمت : انشالله عمي
** طق طقق طققق
بوعلي : هلا وغلا هلا بالجمال والحلاه هلا مريم شيخة البنات هلا ببنتي
مريم : ههههههههههه فديتك خالي " تبوس راس خالها "
خالد : انه استأذن ... مريم اشوفج عقب 3 ايام لاني بوصلكم المطار انتي وشريفه
مريم : انشالله مع السلامه عمي
خالد : الله يسلمج يالغاليه
** طلع خالد وبوعلي كان يبي يكلم مريم
بوعلي : مريم بنتي انه مقدر كل اللي صار لج في هالفتره راح اطلب منج طلب واتمنى ماترديني بس الشئ راجع لج
مريم : آمر خالي عيوني لك
بوعلي : تسلمين .. مريم انه ودي لو انج تيين تسكنين عندي في البيت والله هذي منيتي انج تيين عندي البيت وصدقيني كل اللي تبينه راح يصير
مريم ضحكت : خالي والله الله العالم اني احبك واعزك وانه لو الود ودي كنت سكنت عندكم من اول شئ بس تدري ماكان بيدي شئ
بوعلي : هاااا وصلنا خير يالله نروح البيت حبيبتي فداج خالج والله
مريم مستانسه لانها تربت في بيت خالها البيت مو غريب عليها ومرت خالها كانت تصير بنت خالة امها يعني مو غريبه عليها و روان بنت بوعلي كانت رفيجة مريم وتحبها وايد وفي نفس العمر و علي 15 سنه و طبعا دانه الصغيره 3 سنوات
راحت مريم بيت خالها وروان كانت اول المستقبلين فرحت وضمتها وقالت : هلا باختي حبيبتي
مريم : مشكووورة روااان والله اني مستانسه
وسلمت على مرت خالها اللي كانت تموووت في مريم
مريم ماراحت بيت عمها عشان تاخذ اغراضها لانه ام راشد وصلت الاغراض ويا خدامة مريم بيت خالها وجهزو لها غرفه حلوووووه ارضيتها من الخشب الروز ولونها وردي فاتح ويغلب عليها الطابع الانكليزي الكلاسكي وسرير عوود متروس مخدات ناعمه و علقو صور مريم واهي صغيره وصور خوانها وامها وابوها .. وكان في فاصل في الغرفه زجاجي اذا انفتح كان يودي الصالة الصغيره الخاصه بمريم .. فيها كراسي و تلفزيون وكمبيوتر و عدالها كانت غرفة الملابس .. اول ماشافت مريم الغرفه فرحت واستانست لانها واااااااااايد حلوووه ومريحه واحلى شئ فيها الغرفه الزجاجيه اللي كانت تطل على الحديقه وبركة السباحه .. ويوم شافت خزانتها شافت ملابس يديده واغراض وايد وطالعت روان بصدمه ! .. بس روان ضحكت
روان : انه بنفسي شريتهم لج لاني اعرف ذوقفج انشالله يعجبونج بس
مريم : باست روان وقالت لها مشكووووورة ماقصرتي بس بعد باروح لندن وباتشرى وبتشوفين الاغراض اللي بايبهم لج ههههه
روان : مو ضروري حبيبتي
مريم : لا ضروروي بكيفج تشترين كل هالاغراض والله اراويج
** مريم كانت مرتااحه وايد ومستانيه وتضحك وحالتها النفسيه تحسنت وايد وطبعا بطلنا سلمان كان عايش احلى ايامه ويا حبيبته كانو يحبون بعض ازيد في كل دقيقه ماكان في شئ يخرب عليهم .. حتى سلمان حلف انه بيروح لندن اذا راحت مريم لانه ماراح يتركها بروحها على الاقل يروح يغير جو عقب كل هالمشاكل ويكون قريب من مريم
لقاء في لندن
**مرت 3 ايام بسرعه وحان يوم السفر الطيارة بتطير الساعه 2 الظهر مريم وشريفه زهبو الشنط وسلمان كان حاجز والكل مرتبش وفرحان مريم كانت اكثر وحدة فرحانه وكانت مخططه شنو بتسوي في هالاسبوعين ريل خالتها عنده شقه في لندن في الاجوردرود ... مريم كانت رايحة لندن من قبل ويا اهلها الله يرحمهم عشان جذيه كانت متردده وخايفه شوي
والساعه 1 خالد كان واقف يتريا مريم وشريفة ومنار
خالد : ماشالله شلتو البحرين في شئ بعد ماوديتوه ؟؟؟
مريم : هههههه عمي بنتم اسبوعين و بنحتاج وايد اشياء
منار واهي تضحك : الله يعين على الشنط اللي بيبونهم من هناك
شريفه : اييييه اصلا احنه مابنخلي شئ مابناخذه
والكل ضحك
بو علي نادى مريم
مريم : خير خالي
بوعلي : مريم ماوصيج على روحج طبعا ريل خالتج والنعم فيه بس بعد الريال مشغول بالدراسه مابيكم تطلعون متأخرين ولا تبتعدون عن البيت واذا بتروحون السوق خبري خالتج مابي يصيدج شئ اوكي ؟؟
مريم : لاانشالله خالي اصلا انا ... وسكتت
بوعلي : شفيج مريم
مريم بحزن : اصلا انا حافظه لندن كنا نروح وايد ( تقصد اهلها )
بوعلي ابتسم : انزيين مريم ابيج تستانسين و تغيرين جو لانه وراج جامعه وكرف .. انه باتصل فيج باتطمن عليج واذا صار اي شئ خبريني على طوووول
مريم : انشالله خالي
وباست خالها ومرت خالها وروان وراحت عند شريفه ومنار
منار : ها نمشي ؟؟؟
مريم وشريفه : توكلنا
وصلو المطار بعد ماودعو خالد وسلمو عليه
** في المطار **
سلمان كان واصل قبلهم وكان ينطرهم يوصلون وفجاه سادت الدنيا لحظه صمت وتلاقت العيون عقب فتره طووويله سلمان وقف وحس الزمن وقف لما شاف مريم حس بروحه انشل مو قادر يقول كلمه ومريم سرحت ودمعت عينها واهي تشوف سلمان وفجاه سحبتها خالتها
منار : مريم مريوومه شفيج صخيتي يالله امشي
مريم : ها انشالله
وابتسمت مريم ابتسامه عريضه وسلمان ماقدر يسوي شئ واهو يشوف مريم تبتسم وفكر " اه من زماااااااااان ماشفت القمره فديييييتها والله كل ما اشوفها زادت حلاه ياالله سبحانك ابدعت في خلقك ماشالله عليها والله انها حوريه
سلمان كان بيروح عند سلطان خطيب نورة سلطان يدرس بامريكا بس كان عنده كورس لغة في لندن وكان ساكن في شقه ويا ربعه حمد و محمد كلهم كانو نفس التخصص وياين لندن 3 شهور عشان الكورس
** في طيارة **
مريم ومنار وشريفه كانو قاعدين يسولفون سلمان كان قاعد بعيد عنهم مريم طول الوقت كانت تفكر فيه ومنار تسولف ويا شريفه
" منار عمرها 23 حبووووبه اصغر وحده من خالات مريم وتشبه مريم وايد متزوجه من احمد ولد عمها وصار لهم سنه .. احمد عمره 26 يدرس في لندن وهذي اخر كورس وبعد مايخلص راح يسكن لندن على طوول وطبعا مع منار .. منار مستصعبه فكرة انها تكون بعيده عن الديره بس اتفقو انهم يقضون اجازات الصيف ورمضان والاعياد كلها في البحرين عشان جذي خذت لها فيلا في البحرين .. واللي مطمن منار انه رفيجتها موزه ساكنه في برايتون مع ريلها وبنتها شيخه .. وكانت رايحه لندن عشان تعدل الشقه وتضيف لمسات عليها كل صيف كانت تروح وتضيف اشياء "
مر الوقت بسرعه ووصلو مطار هيثرو خلصو المعاملات وسلمان كان واقف يطالع مريم ولا يشيل عينه .. مريم مستحيه وشريفه تضحك طبعا منار ماتعرف سلمان عشان جذي ماحطت بالها
خلصو المعاملات وكان احمد واقف يترياهم سلمو عليه وركبو السياره وياه
احمد : هاا شريفه شرايج في لندن ؟؟
شريفه : وايد حلوه انه اخر مره يييت كان عمري 10 سنوات بس بعدني اتذكر ..
منار : ايييه لندن فيها وايد اماكن انشالله تستانسون وترى يسمونها مدينة الضباب
احمد : اي بس في قوانين هههههههه .. جاهزين تسمعون ؟
مريم وشريفه : اييه ههه
احمد : اول شئ ماتركبون اي تاكسي .. انه استأجرت دريول اصله مصري ويتحجى عربي واهو بيوديكم وين ماتبون بس طبعا مو مكان بعيد و مافي تأخير بعد الساعه 10 ولازم قبل ماتطلعون تخبرون منار او تخبروني واهم شئ لاتكلمون احد غريب ودايما شيلو تلفوناكم وياكم وحفظو عنوان الشقه .. في الاجوردرود مافي خوف كلها عرب .. اوكي اتفقنا ؟؟؟؟؟؟
منار : اي يالله قولو انشالله بابا ههههههه
مريم وشريفه : ههههههه انشالله بابا
** وصلوا الشقه واللي كانت فخمه بكل معنى الكلمه كانت تتكون من طابق ونص الطابق الاولي عباره عن صالتين و غرفة الطعام والمطبخ والحديقه الداخليه
والطابق الفوقي مكون من 3 غرف وصاله تتوسط هالغرف
اول ماوصلو البيت استقبلتهم الخدامه وشالت الاغراض بمساعدة السائق وودتهم غرفتهم
شريفه : يا سلالالام واخيرا وصلنا غرفتنا بارتاح شوي
مريم : هههه اول شئ نرتب اغراضنا تعالي
شريفه : ههه لا بعدين خلي الخدامه تعدلهم تعالي نرقد
مريم : اي والله تعبانه بس اول شئ اشوف سلمان وينه ما عرف شنو سوى
تررررن ترررن
سلمان : هلا والله مرييومتي
مريم : هلا وغلا شلونك ؟
سلمان : بخير دام اني شفتج
مريم استحت
مريم : اقول سلمان انته وين الحين ؟
سلمان : انه في شقة سلطان خطيب نوره خلاص وصلت
مريم : اييه زين الحمدالله بترقد الحين ؟
سلمان : اييه تعبان والله
مريم : انه بعد يالله اخليك عشان ترتاح تصبح على خير
سلمان : وانتي من اهله
مريم : مع السلامه
سلمان : مريم احبج
مريم : احبك اكثر
وسدو الخط ورقدو لانهم تعبو من السفر وساعه 5 العصر بتوقيت لندن قعدو من الرقاد ودخلو الصاله بس ماشافو احد
شريفه : ويي مافي احد في البيت
مريم : اكيد منار طلعت ويا ريلها
شريفه : ايي الحين احنه في الباي باي ههههه
مريم : هههه من حقهم ماشافو بعض من زمان
شريفه :انزين ماعلينا انه باموووت يووووع
مريم : انه بعد خلنا نشوف المطبخ
ودشو المطبخ وفتحو الثلاجه بس مالقو شئ يناكل
مريم : هههههههه قلنا بروحك يا احمد عنبوه ماتاكل ؟
شريفه: اتصلي فيهم شوفي وينهم خلهم ايبون لنه شئ ناكله
مريم : اووكي
تررن تررن
منار : الوووو هلا مرامي ها قعدتو ؟
مريم : اييه ونبي اكل مافي شئ
منار : ههههههههههههههههههه ايه ادري انه رايحه السوبرماركت اشتري اغراض تدرون احمد متعود ياكل من المطاعم
مريم : اوكي ننطركم
منار : مريووم احنه يمكن نتاخر لانه باروح اخلص جم شغله سمعي عندج رقم الدريول خله اييب لكم اكل او نزلو الاجوردرود في وايد مطاعم
مريم : خلاص بنروح احنه
منار : اوكي ماوصيج
مريم : اوكي
شريفه : هااا شنو وين بنروح ؟
مريم : نتعشى
شريفه : اوكي خلنا نصلي ونبدل
مريم : اوووكي
صلو وبدلو مريم لبست بنطلون جينز ويا بودي مخطط ازرق ووردي وفوقهم جاكيت جينز نفس لون البنطلون و اختارت وياه شنطه جينز من فيندي ويا نعالتها وحطت لها شدو ازرق خفيف ويا لمعه ورديه على الاطراف وكانت جميله بكل معنى الكلمه
اما شريفه فلبست تنورة بيج مخمل مخططه و بودي اورانج مع سير ناعم من mis sixty وحطت كحل غامج وبلشر اورانج مع gloss نفس اللون وكانت روعه
واتصلت مريم في سلمان عشات تقول له انها بتروح ..
سلمان : اوكي روحوو وانا اول مايروحون الشباب باييكم
مريم : انشالله
وطلعو ويا الدريول وراحو الهايد بارك لانه شريفه وايد خاطرها تروح والجو كان يشجع كان عجيييييييييييب
شريفه : الللللللله وايد حلوووو
مريم : اييييه يبي لنا اكثر منه ساعتين نتمشى و بعد مابنخلص
وتمو يتمشوون ويسولفون مريم كانت كأنها وحده ثانيه ردت لها الروح بس بعد قلبها كان يعورها على اهلها وكانت تطريهم في كل خطوه
وكل من كان يلتفت عليهم ويشوفهم لانهم بالفعل ملفتين مريم بجمالها العربي البحت وشريفه بنعومة ملامحها
شريفه : خلاااص ماستحمل يالله نروح ناكل
مريم : اووكي
وراحو مطعم مروش اللبناني وطلبو اكل وقعدو ياكلوون وبعد ماخلصو راحو الكوفي شوب اللي صاير عداله وطلبو كوفي
ترررن ترررن
مريم : هلا سلمان
سلمان:مريوومتي سووري ماقدرت ايي الشباب ماطلعو واستحيت اطلع من عندهم
مريم : لا عادي والله انه ابيك تستانس
سلمان : اوكي يالله صارت الساعه 9 ردي البيت حبيبتي
مريم : انشالله
ورجعو البيت ومنار بعدها ماردت دشو الغرفه وقعدو يطالعون افلام لي الساعه 1 وبعدها راحو يرقدون من التعب
ومر اسبوع بسرعه وسلمان كان يشوف مريم كل يوم كان يلحقهم في السوق عشان مايصيدهم شئ واذا وقفو ويا بعض الكل كان يطالعهم ويفر راسه صوبهم لانه بصراحه كانو احلى اثنين وجمال مريم العربي كان يشدهم ويجذبهم عيونها السود الوساع و حواجبها السود و لونها الابيض مثل القمر جمال نادر من نوعه مو متعودين عليه لانه كلهم شقر وبيض والعيون ملونه
شريفه ومريم ماخلو شئ وماشروه في السوق من شناط ونعل وثياب وميك اب يعني ماشالله شروا للسنه كلها وطبعا مريم مانست روان ومرت خالها اللي وصتها على اغراض بس للاسف سلمان اضطر انه يرجع قبلهم لانه الوالده كانت تعبانه شوي .. مريم حست بالحزن بس كانت كل يوم تتصل في سلمان وتسئل عن ام سلمان
** خلص الاسبوعين وردوا مريم وشريفه ومعاهم منار البحرين
شريفه ومريم كانو مشغوليين لانه الجامعه ابتدت وماكان عندهم وقت لأي شئ
وتمر الايام بسرعه وتمر سنه على الحادثه ومريم تحاول انها تمشي حياتها وكانت مستانسه خصوصا انه سلمان كلم خالها وخالها قال انه بشاور مريم بعد امتحاناتها وبيرد عليهم خبر
طبعا بو علي كان عارف سلمان وكان يدري انها ثاني مره يتقدم لمريم
ومر اسبوعين وخلصت مريم الامتحانات
على الغدا
بوعلي : ها بشروو شنو سويتو في الامتحانات ؟
روان : يبه انه سوييت زين امتحاناتا سهله وايد هههه والله وناسه الفنون
مريم : ياحظج والله انه تعبت امتحانتنا صعبه بس انشالله انجح
ام علي : انشالله يارب يوفقكم
بوعلي: مريم اول ماتخلصين غداج نطريني في غرفتج ابيج في سالفه
مريم :انشالله عمي
** في غرفة مريم **
بو علي : مريم يا بنتي تتذكرين بوسلمان ؟
مريم واهي مستحيه ( طبعا عارفة الموضوع ) :ايه
بوعلي : ردو خطبوج لولدهم سلمان .. انه مارديت عليهم وقلت اني بشاورج انتي الاول قبل اي شئ وابيج تفكرين قبل لا تاخذين قرارج وهذي مستقبلج ..
مريم : .....
بوعلي : ها مريم ؟
مريم واهي تحاول تخفي ابتسامتها: اللي تشوفه خالي سلمان ماعليه زود وام سلمان حسبت امي الله يرحمها ماخلوني دقيقه جميل ما انساه
بوعلي : ماشالله عليج يا مريم ادريبج عاقله .. انتي موصغيره واظنج فاهمه انه اهل ابوج الله يرحمه يبونج لواحد من عيالهم مايبونج لاحد غير بس اذا انتي موافقه على سلمان وتبينه خلاص .. مالنه شغل في احد ثاني وللأمانه مريم كذا واحد تقدمو لج بس انه ماشفتهم يناسبونج طبعا بعد ماسئلت وتحريت عنهم ولاني ماكنت ابي اشغل بالج في فترة امتحاناتج
** مريم باست خالها والدنيا ماتشيلها من الوناسه اخييييييرااااااا بيتحقق الحلم ..
مريم : انه متأكده من شورك خالي .. دامك تشوف سلمان زين خلاص خالي اللي تشوفه انت
بوعلي : مبرووك مريم تستاهلين .. انه باكلم بوسلمان وباحدد كل شئ
مريم واهي مستحيه : الله يبارك فيك خالي
** طبعا بو علي خبر بوسلمان انه البنت وافقت وحدد معاه موعد يوم الخميس عشان ايوون ويتفقون على كل شئ
من الصوب الثاني سلمان الدنيا ماشالته من الوناسه كان يخطط لكل شئ .. البيت اللي بيجمعه ويا مريم عيالهم حياتهم كل شئ .. يتخيلها وياه في بيت واحد مستانسين