[أم ضياء...]

** وفي بيت بوراشد

ام راشد : بو راشد بوسلمان رد خطب مريم لسلمان وبيوونهم الخميس
بوراشد : اييه ادري اتصل فيني ومحد له حق يروح ان رحتي انتي ولابناتج حشيت ريولكم
ام راشد : بس يا بو راشد مريم كانت عندي بالبيت حسبت بنتي مايصير ماروح
بوراشد : كلام قلته ويتعداكم وياويل اللي يخالف .. انه خواتي هددتهم مايروحون بس والله مايستحون يكسرون جلمة اخوهم العود والله زمن
** وقعد يتحرطم وام راشد في قلبها حسره انها مابتروح

** في هالاسبوع مريم كانت مشغووله وايد كانت تتجهز لليوم اللي بيخطبونها فيه ..

مريم : الووو شرووف
شريفه : هلا والله الريم
مريم : شريفه طلبتج
شريفه : امري
مريم : ابي اروح المول ابي اشتري جم شغله
شريفه : اوكي .. ساعه جم ؟
مريم : بعد نص ساعه
شريفه : بتروحين بروحج ؟
مريم : لا الدريول بيوديني
شريفه : اوكي انطرج ..
مريم : اوكو باي

** روان كانت واقفه ورا مريم بس مريم مانتبهت لها
روان : هلا مريم
مريم : ها رواني شتسوين
روان بشمئزاز : ولاشئ ؟ !
مريم : اييه انزين يالله انه باروح ابدل باروح المول تبين اييب لج شئ ؟؟؟
روان فرت راسها عن مريم : لا سلامتج

** طبعا من بعد ما سكنت مريم بيت بوعلي صارت تشارك روان في كل شئ حتى امها وابوها ومن طبيعة الانسان حب التملك والغيره ..روان كانت مستانسه اول شئ لما يت مريم بيتهم بس شوي شوي كل شئ تغير روان ماكانت تكره مريم بس كانت تغير لما تشوف امها او ابوها يهتمون فيها اكثر منها ..

طبعا مريم كانت وحيده والكل كان يحاول انه يكون قريب منها ويعوضها بس روان ماكانت فاهمه هالشئ وكانت تنظر لمريم على انها دخيله في حياتها وتبي تسرق الاضواء منها بعد ماكانت روان دلوعة امها وابوها الحين مريم تشاركها الحنان والدلع ..

مريم ماحست بشئ بالعكس اهي وايد كانت تعز وتحب روان وكانت تتفهم لين تشوف روان اتيي تقعد عند ابوها لما مريم تكون وياه وتتدلع جدام مريم صحيح انها كانت تحط في قلبها بس بعد تدري انه من حقها اللي تسويه ..

واكثر شئ كان يخلي روان تنقلب على مريم .. اهي شريفه لانه شريفه وروان ماكانت علاقتهم زينه بسبب مشاكل كانت تصير في المدرسه بينهم .. وكانت تحاول بأي طريقه انها تبعد مريم عن شريفه

** مريم ركبت غرفتها وقعدت تدور شئ تلبسه .. احتارت وعفست الكبت كله بس فجأة لمحت شئ موجود في نهاية الكبت استغربت ماعرفت شنو هالشئ مدت يدها ولما شافت الشئ انصدمت ماصدقت اللي تشوفه !؟

كان كيس ! وفي الكيس كانت الساعه اللي اهداها اياها سلمان الساعه اللي اجمعتهم ويا بعض .. استغربت مريم ! لانها كانت مضيعه الكيس ذبحت عمرها واهي تدور عليها في بيت عمها بوراشد بس مالقتها .. ماعرفت شلون وصلت اهني بس في خاطرها كانت تفكر انه الخدم اكيد شالوها ويا الاغراض وخلوها اهني

استانست وايد على الساعه لبستها وابتسمت وفجأه تذكرت شريفه
مريم : اووووه تأخرت عليها مسكينه اكيد تنطرني
ويرن تلفون مريم
تررن ترررن

مريم : سوري والله سوري كاني طالعه
شريفه : ماصارت ياالله .. والله خست
مريم :اوكيييي


طلعت مريم من الكبت طقم .. دفه وشيله وفيها تطريز خفيف في اليد ونفس التشكيله في الشيله على الاطراف .. لبستهم وكانت احلى بمليون مره عليها من الثياب .. تكحلت و شالت شنطة ورديه من إسكادا و طلعت بسرعه عشان تلحق على شريفه



** مريم وشريفه كانو في المول يتسوقون ويدورن شئ حلو عشان تلبسه مريم ليوم الخميس

مرت اكثر من ساعتين واهمه ليلحين ماحصلو شئ
مريم بحزن : شرووف تمللت ماحصلت شئ حلوو
شريفه تشجعها : معليه في محلات مادشيناها للحين
مريم : زين خلنا ندش MonSoon
واخيررا اختارت مريم فستان منMonsoon كان حلوووو وايد لونه فوشيا ناعم مافيه تعقيدات بسيط ويتكون من قطعتين تنورة وتوب لامع وكان مناسب ليوم الخميس وحصلت وياه الاكسسورارت المناسبه

وردت مريم البيت تعبانه رقدت بعد ماكلمت سلمان وكل واحد فيهم يحاول يقضي وقته بالرقاد عشان تمر الايام بسرعه


يوم الاثنين ... الساعه 6 الصبح

طوووووووووووووووووووووط طووووووووووووووووووووط كان جرس بيت بوعلي وكان يبين انه احد مستعيل حتى الكل قعد من الرقاد

نزلت ام علي عشان تشوف من .. وتفاجأت يوم شافت منار واقفه واهي تصيح ويوم شافت ام علي زاد صياحها
نزل بو علي واهو مستغرب ومنصدم ! منار متى ردت من لندن وين احمد ؟ وشفيها تصيييح

مريم سمعت الحشرة ونزلت تشوف شصاير

منار كانت تصيح وتقول الله يلعنا الله لايبارك فيه
مريم خافت وايد ماتدري خالتها شفيها وليش هلون تصيييح تأثرت بالموقف و دمعت عينها

بو علي : بس اختي خلاص حرام اللي تسوينه فهميني شصاير ؟؟؟؟؟
منار : بطلقنيي سواها فيني ياخوي ماقدر استحمل
بوعلي : من احمد ؟؟
منار : ايه احمد اه يا خوي لو تدري شسوى فيني في الغربه
بوعلي وقلبه يتقطع على اخته : سمي بالله وهدي نفسج وفهميني شنو صاير وانشالله كل شئ بيتعدل
منار : ياخوي مافي شئ بيتعدل .. هذا ولد عمي وطلع خاين "ويزيد صياحها "
بوعلي : خاين ؟؟ اعوذ بالله شمسوي ؟
منار : تخيل انه يخوني ويا وحده مغربيه وفي بيتي بعد وجدام عيني !
مريم ماستحملت حالة خالتها رمت روحها بحظن خالتها وقعدت تصيييح من الخاطر .. خالتها ماتهون عليها وتحس باللي اهي تحسه
بوعلي يمشي يمين ويسار مو عارف شيسوي
ام علي تحاول تهدي الاوضاع بس موعارفه شلون
بوعلي : منار يالغاليه لاتحاتين شئ
منار : شلوون ماحاتي ؟! وانه لا ام ولا ابوو ؟؟؟ وين ارووح يا اخوووي شاسوي في هالدنيا شلوون اربي ولدي ؟؟؟؟؟؟؟
بوعلي : انتي حامل منار ؟؟؟
منار : اييه حامل وتصيح وبطلقنييييي تخيل ؟؟؟؟؟؟؟؟؟؟؟؟؟؟
بوعلي : افا يا اختي شنو هالكلام شنو لا ام ولا ابو انتي اهني في بيتج امعززه مكرمه لاتنسين هذي كان بيتج قبل لاتعرسين هذي البيت العود بيت امي وابوي لج حق فيه مثل ماهو بيتي .. انتي وولدج في عيونه افا عليج
ويحظن اخته ويحاول يهديها

** جملة لا ام ولا ابو اثرت في مريم وايد خافت ايي يوم وتكون في موقف خالتها .. كان خايفه ومحتاره احمد كان يحب منار وكان ولد عمها ! معقوله يسوي فيها جذي ؟؟ ويطرشها الديره جذي بروحها ويطلقها ! بس مريم تطمنت وتذكرت انها واثقه في سلمان وحبه لها ماكانت تبي تشك ولا لحظه انه سلمان بيسوي جيه بس بعد اثرت فيها حالة خالتها وايد

دانه الصغيره بنت بو علي (3سنوات) كانت متعلقة في مريم وايد خافت يوم شافت مريم تصيح وخالتها تصيح .. مريم شالتها وودتها فوق وقعدت وياها مريم تعلقت في دانه لانه اسمها على اسم المرحومه اختها وسبحان الله كانت تشبها في بعض الملامح والحركات
وبعد ماكلم بوعلي منار وخلها تهدى راحت منار لغرفتها الي كانت قاعده فيها قبل ماتتزوج من احمد حطت راسها ورقدت من التعب

** البيت اللي ساكن فيه بو علي اهو بيت العايلة ولانه جاسم ( بو علي )اهو اكبر اخو ل3 بنات سكن في البيت ومنار كانت وياهم قبل لاتعرس


ال3 بنات .. ام محمد كانت اكبر وحده الله يرحمها وبعدها فاطمه متزوجه وعندها بنتين وولد (منى و صفاء .. مبارك ) وطبعا منار اصغر وحده

** وبعد يومين تحسنت حالة منار وهدأت و عرفت انه واحد مثل احمد مايستاهل اللي اهي تسويه .. وعشان خاطر اللي حواليها كانت تحاول انها تطلع روحها من اللي اهي فيه وخصوصا ان خطوبة مريم بتصير باجر


يوم الاربعاء صار شئ محد كان يتوقعه ..و عفس كل شئ !

بوسلمان : سلمااان وينك ؟؟ بسرعه تعال ؟؟
سلمان : خير يبه وين انت ؟؟؟؟؟؟
بوسلمان : انه ........................

سلمان : انته وين يبه ؟؟؟؟؟؟
بوسلمان : انه في المستشفى !
سلمان : شنووووووو لييييش ؟؟؟؟
بوسلمان : بوراشد عم مريم مريض فيه فشل كلوي وحالته وايد خطره
سلمان : لاا مسكيين لاحول ولا قوه
بوسلمان: انه كنت رايح اخذ فحوصات امك شفت بناته هناك يصيحون وام راشد وياهم يوم شفتهم رحت اشوف شبلاهم وسمعت الخبر واتصلت في اخوانه
سلمان : لا مايشوف شر انشالله يقوم بالسلامه
بوسلمان: انشالله

** تاثر سلمان بالخبر واكثر شئ خلاه يحزن انه الخطوبه اكيييد بتتأجل مادام عم مريم مرييض .. وماتصل فيها لانه ماكان يبي يضايقها وينقل لها الخبر

** في بيت بو علي

منار ومريم قاعدين وياهم دانه تلعب بالباربي

دانه : عمووه انه وايد حلوه مثل باربي
منار : لا حبيبتي انتي احلى من الباربي تعالي عندي فدتج عمتج والله
مريم : دانه انه احلى منج صح ؟
دانه تطالع مريم بنص عين : لا مابي .. انه احلى وحده مثل باربي
منار : يا ام لسانين .. مانقدر نقول لج شئ انتي الدلوعه
دانه: عمموو عمووو
منار : عيون عموو
دانه: انه ابي الوان عشان اصير مثل باربي
مريم ضحكت : ههههههههههههههه تقصد مكيااج
منار : هههههههههه

** الجو كان هادئ ومريم تلاعب دانه وكالعاده منار كانت تحس بدوخه وتلوع جبدها من الوحام

منار : اففففففف والله كرهت حياتي
مريم : معليه خالوو ماباقي شئ
منار : باقي 7 شهور
مريم : الله وبتيبين لنا بنت حلوه
منار بحزن : انشالله
مريم لاحظت الحزن بعيون خالتها وحاولت تغير الموضوع
مريم : خالوه باجر اي صالون اروح ؟
منار : اممم روحي الميرديان
مريم : اييه انه حاجزه عندهم وعند نورة
منار : نورة مكياجها حلوو بس خلج على نوره

** ويقطع عليهم تلفون مريم

تررررن تررررن

خالها كان متصل

بوعلي : هلا مرامي شلونج
مريم : تمام خالي شلونك ؟
بوعلي: بخير .. وين منار وروان ؟؟
مريم : منار اهني ودانه ويانه .. امم روان راحت بيت صديقتها فطوم
بوعلي : ايه انه اتصل تلفونها كان مغلق .. المهم بنتي
مريم : آمر عمي
بوعلي : ادري انج عروس ومستانسه والمفروض مافي شئ يكدر عليج بس غصبا علي اقول لج لانه شئ ماقدر اخشه عنج
مريم انقبض قلبها : خير عمي شصاااير ؟؟؟؟
بوعلي : كاني قريب من البيت بايي وباقول لج
مريم : اوكي عمي انطرك

* مريم تغير لونها ماتدري شصاير كانت خايفه
منار: مريم شفيج ؟؟؟
مريم : مادري خالووه .. خالي قال يبيني في سالفه ويبين انها كانت جايده
منار : خير انشاالله انتي لاتحاتين

وعقب 10 دقايق دش بوعلي االبيت سلم وقعد

مريم : خالي شصاير ؟؟؟؟؟
بوعلي : عمج بوراشد
مريم وقفت : شفييه عمي ؟؟؟؟؟؟
بوعلي : والله وايد مرييض .. فيه فشل كلوي وحالته خطره الله يساعده

مريم انصدمت من الخبر .. ونزلت الدموع من عينها

مريم : لاااا عمي مابيه يصيده شئ .. ودوني ابي اشوفه ودوني الله يخليكم
بوعلي ومنار مستغربين من ردة فعلها بعد اللي سواه عمها

بوعلي : لاتبجين حبيبتي يالله قومي لبسي باوديج
مريم : بس باييب عبايتي
بوعلي : يالله انطرج

* ركبت مريم السيارة واهي تصيييح وتفكر في عمها .. نست كل اللي صار وبصوت خافت كانت تقول " الله يرعاك عمي مابي يصيدك شئ انت اخو ابووي .. ابوي كان يحبك .. انت تشبه ابووي مابي يصيدك شئ انته عمي اسمي من اسمك انه قطعه منك .. مابي بنات عمي يصيرلهم مثل اللي صار لي

بوعلي كان يسمعها وقلبه يتقطع عليها خايف انها تفقد عمها وتصيدها صدمه .. مع انه ماشافت شئ زين من عمها بس قلب مريم كان ابيض وكانت حنونه وماتشيل على احد

وصلت المستشفى وشافت العايلة كلها متيمعه سلمت عليهم مريم وقعدت تواسي بنات عمها .. واهمه ينطرون قرار الدكتور مريم كانت تقرا قرآن وتدعي الله يقومه بالسلامه


* رد بوعلي البيت كانت منار قاعده ويا ام علي ودانه كانت راقده

بو علي : السلام عليكم
ام علي : وعليكم السلام ... بشر شلونه بوراشد ؟؟
بوعلي : والله ماشي خبر .. ينطرون قرار الدكتور
منار : اخوي .. وينها مريم ؟؟ ماشوفها وياك ؟
بوعلي : والله حاولت ايبها وياي بس ماطاعت .. قالت بتقعد
منار : ماعليه اذا انت تعبان اخوي روح ارتاح انه قاعده اذا اتصلت باروح ايبها ويا الدريول وباخذ علي ويانه

ام علي : ايه صج تراني اتصلت في ام سلمان وخبرتها اتأجل الخطوبه
بوعلي : اي زين سويتي .. يالله انه باروح ارتاح شوي

ام علي : الله وياك .. شل دانه وياك وحليلها راقده اهني
بوعلي شال بنته وباسها اول ماركب الدري تذكر شئ

بوعلي : اقول وينها روان ؟؟؟؟ للحين ماردت ؟
ام علي : لا والله مادري وينهي تلفونها مغلق اتصلت على تلفون فطوم ماشالته
بوعلي : لاحول متى بتعقل هالبنيه .. وتخفف من هالطلعات الحين الوقت متأخر شوفيها وين
ام علي : خلاص لاتحاتي انه باشوفها


** الجو عن روان

سالم : فديتج والله حبيبتي ... تعالي قربي مني
روان : هههههههههههه اقرب اكثر من جذي ؟؟؟؟
سالم : ايه ماستحمل تكونين يمي بس قاعده بعيد عني
روان : سالم تأخر الوقت خلنا نرجع الشقه اكيد فطوم تنطرني الحين
سالم : ايه يوسف اتصل فيني قال لي تأخرو لانه يبي يقعد ويا فطوم
روان : انزين خلنا نروح نقعد في الشقه شوي وبعدها برد البيت
سالم : اوكي بس بشرط
روان : آمر
سالم : نقعد في غرفتي وبروحنا ابيج في سالفه شوي
روان : هههههههههههههه اوكي ولايهمك .. بس شنو السالفه ؟؟
سالم بخبث : لين وصلنا بتعرفين .. ترى بيون شباب ابيج تسلمين عليهم ..
روان : اوكي
سالم : وبعدين لاتلبسين الشيله جدامهم .. حرام تخشين هالجمال والشعر لازم اخليهم يشوفون حبيبتي شحلاتها
روان : لازم يعني ؟
سالم : ايه لازم يرضيج يقولون اني احب وحده قرعه ماتبي احد يشوف صلعتها ؟؟
روان بغضب : لا اكيد مابي .. مو بس باقط الشيله بافل شعري بعد هههههههه عشان محد يقول جذي
سالم : انتي جذي تمام .. مطيعه


** في المستشفى ..

الكل قاعد ينطر وتمر 3 ساعات واخييييرااا وصل الدكتور ونادى على خالد بوراشد

خالد : ها دكتور بشر شلوونه اخووي ؟؟؟؟
الدكتور : والله يا اخوي الحالة صعبه الكليه ماتشتغل لازم نستبدلها ونزرع مكانها كليه ثانيه
خالد : لاحول الله ... انزين مافي حل ثاني ؟
الدكتور : لا والله يا خوي .. لازم احد يتبرع له بكليه

خالد سكت واحتار .. وبعد لحظه صمت قال

خالد : انه باتبرع يا دكتور هذي اخوي قطعه مني واجبي اسوي هالشئ
الدكتور : بارك الله فيك .. طيب تعال اسوي لك فحص اشوف اذا في تطابق ولا لا

* خالد كان مقتنع باللي يسويه اهو كان يحب اخوه ويعزه وايد ..

وبعد ماسوى خالد الفحوصات طلع من الغرفه وعينه على بنات اخوه .. حس براحة نفسيه وارتاح يوم حس بأنه قاعد يسوي شئ عشانهم

ام راشد : بشرني شنو قال الدكتور ؟؟؟؟؟؟
خالد : الكليه ماتشتغل ولازم احد يتبرع بكليه عشان يزرعونها له .. انه سويت الفحوصات والحين انطر نتيجة التطابق

استانس الكل وارتاح بس مريم كانت ساكته مانطقت بكلمه .. بس حمدت الله انه في علاج


وتمر الدقايق ويطلع الدكتور وعلامات الحزن على ملامحه

خالد : ها دكتور شلوون ؟؟؟
الدكتور : للأسف مافي تطابق
خالد حس بالحزن واليأس : لااا .. شنسوي الحين
الدكتور لازم احد يتبرع بالكليه وبأسرع وقت عشان نقدر ننقذه

الكل سكت محد رد .. حتى طلال وراشد عيال بوراشد مانطقو اخوانه ماتكلموو خواته كل وحده فيهم تفكر في عيالها وزوجها والتأثير اذا تبرعو بكليه



فجأه





وقفت مريم ....

مريم : دكتور انه باتبرع

الكل شهق من المفاجأه محد توقع هالشئ من مريم بس مريم كانت واقفه بشمووخ واصرار على موقفها

خالد : لا يا مريم مستحيل اخليج تتبرعين
مريم : ليش يا عمي ؟؟؟؟ الحين عمي مريض وحالته خطره واذا انه بنت اخوه ماتبرعت له من بيتبرع ؟؟ هذي عمي اخوي ابوي

الكل حس بالخجل من كلام مريم .. خصوصا طلال وراشد نزلو راسهم واستحو من جرأه هالبنت وطيبه قلبها وشجاعتها

خالد ماوافق بس الدكتور سوا فحوصات وكانت النتيجه متطابقه .. مريم كانت مصره انها تتبرع بعد ماتشاور سلمان وخالها

** مريم كانت مصرة وواثقه من قراراها وفشلت كل المحاولات في انها تغير رايها .. واستسلم خالد وراح يتصل في خالها عشان ايي يمكن يقدر يقنعها .. والدكتور كان يلح عليهم عشان يسرعون لانه الوقت يداهم ومو في صالح عمهم ..مريم كانت بينها وبين نفسها محتارة وخايفه ماتدري شنوراح يكون موقف سلمان وشنو تاثير هالشئ على حياتهم دشت المصلى وصلت ركعتين وقعدت تقرا قرآن بخشوع ويصوت ترتجف له الابدان من خشوعه وجماله.. ونزلت من عينها دمعه ساخنه ماتدري شنو سببها .. سلمان ؟ او ظلم الزمن ؟ او قسوة الظروف اهي ماكانت تدري .. طلعت من المصلى وقعدت في غرفة الانتظار واهي تجهز كلام عشان تكلم سلمان وبعد صراع طويل بينها وبين نفسها تشجعت واتصلت في سلمان

مريم : الوو
سلمان : هلا وغلا شلونج ؟؟؟؟؟
مريم ببرود : يسرك الحال .. انت شلونك ؟
سلمان وقلبه منقبض حاس انه في شئ : تمام ربي يسلمج
وبعد لحظه صمت تنهدت مريم وكان يبين انها تصيح
سلمان : شفيييج مريم ؟؟؟ والله عورتي قلبي ؟؟ ماعاش من يزعلج الله يخليج شفيج ؟
مريم : ماقدر يا سلمان غصبا علي
سلمان : شنو اللي غصبا عليج ؟؟
مريم قالت كل شئ مره وحده : عمي يا سلمان تعبان وكليته ماتشتغل ولازم احد يتبرع له عمي خالد ماطلعت نتيجتة متطابقه انه سويت فحص وتطابقت النتيجه
سلمان : شنو يعني ؟؟؟
مريم : ودي اتبرع له يا سلمان مهما يكون هذي عمي ومحتاج لي لاحد وياه في هالوقت ماقدر مايهون علي عمي
سلمان عصب واول مره يصارخ على مريم : لااااااااااااااااا والف لااا لاتفكرين انج تسوين هالشئ ترى والله ازعل منج وبحط في قلبي عليج وبيتغير اللي بينه
مريم واهي تصيح : بس يا سلمان مافي حل ثاني ارجوك افهمني
سلمان عصب ازيد : لاا انه مو موافق وشيلي هالفكره من راسج
مريم انصدمت من الطريقه اللي يكلمها فيها سلمان وسكتت من الصدمه
سكت سلمان بعد ماحس بلذنب انه صارخ عليها وكلمها بهالطريقه ..
سلمان بصوته الحنون : مريم ؟؟
مريم : ................
سلمان : مريم ردي علي
مريم بصوت مبحوح : نعم
سلمان : حبيبتي لاتزعلين مني لاني عصبت عليج بس والله من خوفي هذي الشئ مو سهل مابي يصيدج شئ وحرام عليج انتي بعدج صغيره خلي عياله يتبرعون له
مريم : انه مازعلت يا سلمان مازعل منك بس محد بيتبرع له انه اعرفهم عيال عمي قلبهم قاسي .. وانا ماقدر اخلي عمي يمووت جدامي حاول تفهمني

ومرت اكثر من ساعتين ومريم تحاول تقنع سلمان انها تتبرع .. سلمان شاف مافي فايده يعرف انه مريم عنييده واللي في بالها تسويه وافق ودموعه تتسابق على خده وقلبه يتقطع عليها مو قادر يتخيل انها بتسوي هالشئ ومريم حالتها ماكانت احسن كانت تصيح لانها تشوف سلمان بهالحالة سلمان سد الخط من عندها وطلع من البيت واهو متضايق و دموعه على خده راح ولا احد يدري وين راح محد تجرأ يسئل

** طبعا بوعلي ماقدر على مريم كانت مصره بشكل غرييييب وتحاول انها تقنع خالها بأي طريقه حتى دموع خالتها ماخلتها تتنازل عن هالشئ واخييييرااا اذن لها خالها واهو بيموت من الحسره

مريم رسمت ابتسامة الانتصار على شفايفها وبسرعه دخلت على الدكتور ..
مريم : انه جاهزه يادكتور
الدكتور : بارك الله فيج .. انتي متأكده يا بنتي ؟
مريم : ايه متأكده
الدكتور : خلاص انتي الليله راح تمين عندنا ونسوي فحوصات وانشالله باجر بتكون العمليه

وقعدت مريم ويا الدكتور عشان يشرح لها شنو راح يصير .. طمنها الدكتور ان الانسان يقدر يعيش بكليه وحده عيشه طبيعيه من دون مايأثر هالشئ وانه العمليه انشالله ناجحه مريم تطمنت وبقت في المستشفى بس ما غفى لها جفن .. كانت تفكر في سلمان وقالت لازم اخبره اني راح اسوي العمليه باجر ماقدر اخليه جذي


** روان كانت في عالم ثاني ..كانت في شقه سالم قاعده وياه في غرفته
سالم : محلاج والله
روان : استحي هههههههه
سالم : طيب اكا الربع وصلو تعالي سلمي عليهم لين ناديتج وابيج تتعدلين
روان : ولايهمك
**
** روان مثل ماقلنا بسن مريم .. بس تختلف عنها روان تحب الطلعات وعندها سوالف وشباب تكلمهم وتطلع وياهم وعندها ربع يشجعونها على هالشئ اكبر دليل صديقتها فطوم المشهورة عند الشباب .. طبعا اهل روان ماعطينها ثقه عمياء ومايتخيلون هالشئ من بنتهم وفي الاجزاء اليايه راح تتضح لنا شخصية روان اللي راح يكون لها دور في انها تقلب الموازين

**مريم كانت تحاول ترقد بس ماقدرت وكانت تحاول تتصل في سلمان بس ماطاوعها قلبها فكتبت له مسج ( آسفه على كل شئ يا سلمان بس والله هذا الشئ واجبي ولازم اسويه .. انشالله باجر بتكون العمليه )
*ارسال
** جاري ارسال الرساله
** تم ارسال الرساله

بس ماوصلها رد !!!!!!!!!

خافت مريم واتصلت على التلفون شافته مغلق حست انها بتمووت من الخوف مرت اكثر من 3 ساعات ومريم في حالة هستيريه تصيييييح واهي مو عارفه شتسوي

واخيراااااااا اتصل سلمان

مريم : الووووووو ؟؟
سلمان : ......................
مريم : سلمااان ؟
سلمان مارد عليها بس قعد يصيييح صياح يقطع القلب مريم اول مره تشوف سلمان يصيح ماقدرت تتحمل لانه موراضي يسكت موراضي يسمعها يصيح بصوت عالي ويتنهد واهي خلاااص ماقامت تحس بأي شئ ومرت اكثر من نص ساعه وسلمان يبكي بصمت ومريم نفس الشئ محد يكلم الثاني
مريم ماتحملت وتكلمت : سلمااان
سلمان: نعم
مريم : عشان خاطري لاتسوي جي والله انه مابيصير فيني شئ الله يسهل انشالله .. الدكتور طمني انه هالشئ ماراح يأثر علي والله
سلمان : اه يامريم ليش تسوين جذي ؟ والله ماقدر اتخيل انج في غرفة العمليات والاجهزه عليج وانتي بخطر لا مريم ماقدر خليني انه بتبرع له بس انتي لاتتبرعين
مريم : فديتك والله سلمان اذكر ربك وادعي الله يسهل وانشالله مايصير شئ اللي الله كاتبه بيصير
سلمان : ونعم بالله
سلمان حاول يمسك روحه وتكلم عادي وياها بس كان يحترق من داخل وسد الخط عشان ترتاح مريم وتم سهران يصلي صلاة الليل ويدعي ربه انه يقومها بالسلامه