تخيلـوا لـو الحريـم بيسـوقـن
ونلقى لهن في كل شـارع طرايـف
تلقى العجايز فالشـوارع يـدورن
وسيارة الاسعاف ترقـب حتايـف
وليـا تأخرنـا دقايـق يصيـحـن
ثم اركبن فـوق المواتـر ولايـف
وقامت تكبس لـك بالانـوار ياهـن
بين اخوياك وصرت محرج وخايف
وتخيلـوا لـو ذات يومـاً يمـرن
عليك دوريـات والجمـس طايـف
ويوم اطرحوه يصير موقفك محزن
تلقا العجـوز مكلبشـه ياحسايـف
وتلقا البني في كـل جلسـه يتكـن
طقة بلوت ومعهن الكيـف كايـف
هذي تبا تحكم وهـذي تبـا صـن
والبيت ضايع دون طبخ وغرايـف
ياللي ذنوبك فـوق راسـك يحنـن
اللـي فقلبـك طلعتـه الشفـايـف
انظارنا من فوق فكـرك يشوحـن
ونشوف شـيٍ ماتشوفـه ياهايـف
حق المره ياشيخ تلعب على من !!
خبلان حنا ولا ويش انت شايـف ؟
وين انت عن صوت الارامل ينوحن
وين انت عن حق المره فالوظايف
وين انت عن جملة بناتٍ يضيعـن
وين انت ياراعِ العلـوم النصايـف
لوهي بيديكـم كـان قلتـوا يغنـن
لكن صدمتـوا فالجبـال النوايـف
من دونهـن حنـا وبقلوبنـا هـن
الطاهـرات الساجـدات العفاايـف
والمسئله لاصـار لحقـة شرفهـن
يروح فيها يـا آل زلفـه طوايـف
هذا كلامي واسمعه زيـن واذعـن
قلته ولانـي مـن تواليـه خايـف
قلته واباقف وارفع الصوت واعلـن
ارادة الامـه علـى لسـان نايـف
ماهـو تخلـف لارفضنـا يسوقـن
راس التخلف لاتركنـا العطايـف