[عـازف الآهـات]

الله اللي راد والعقده قضاها اللي عقدها
لا على الدنيا سلام ولا لباقي العمر زينه
الفضى ما كنه الى خيمة طاحت عمدها
والفرح ما كنه الى شيخ انقصت يدينه
والعمر قطعة زجاج كسرت ولا طال امدها
والعرب في العيد بدموع اليتامى مستهينه
والشوارع لفها ثوب الظلام اللي هجدها
والبيوت اطلال من عقب المحبه والسكينه
والشتا والليل والبرد والسما يصرخ رعدها
والعيون اللي ورا الشباك مذعوره حزينه
طولوا في الكهف ألأصحاب وبقت روحي وحدها
كنها في كوكب ثاني خلا من ساكنينه
الوداع اللي بعلم العين يعبر من رمدها
والوداع اللي بلا علم لقفص صدري غبينه
والوداع اللي بلا رجعه على ياأ مر وأدهى
والله انه غرغرة سم وسكاكين سنينه
والعنود اللي جفيت الناس والدنيا بعدها
مدت الفرقا لغاليها وهي تعطي الثمينه
وينها كيف اتركتني ليه ماجت في وعدها
والقمر لا طل خابرها تجي بيني وبينه
رحت انادي واتلمس في مهب الريح يدها
كني حصان بلا صاحب طوى البيدا حنينه
رحت أصيح الصبح وينه والعرب ما رد احدها
ما سمعت الا صدى صوتي يقول الصبح وينه
كنهم من يوم ذيك الشمس غابت عن بلدها
طلعوني في النفود وصكوا ابواب المدينه
كنهم من يوم ذيك الذاهبه محد وجدها
كل رجال من الشرهه قلع في الدرب عينه
أثرها ما تت وماتت كل فرحه في مهدها
والربيع اقفت به اللي كانت التاج لجبينه
جاورت عقب الحدايق حفرة مقسى لحدها
حفرة ماني مصدق كيف ضمت يا سمينه
للحزن فيني مثل ما للطهاره في جسدها
ويش اسوي لا فتشت اللي لها وسط الخزينه
زخرفت حلم وبنت له مسكن وسمت ولدها
آآه لو غرد ولدها في خميلة والدينه
عاهدتني وظفرت بيمين أقوى من عهدها
والصميله خير فيه ان كان ما نفذ يمينه
ما تتقى عن رثاها عرق أقتض بشهدها
ولا تبقى خلف قضبان الجفن عذراء سجينه
كيف عند العالم ايام العزاء محصى عددها
ولا انا طالت شهوره والله اعلم كم سنينه
لا الثرى فيها نبات ولا المشي خفف نكدها
لا السما فيها طيور ولا البحر يمه سفينه
لا القمر هذا مساه ولا العصي هذا رغدها
لا الزهر هذا شذاه ولا الذهب هذا رنينه
قا لوا الشيخ الفلاني مرجع القوم وسندها
قال يبشر با العوض والعلم جينا نا قلينه
ساق لك بدر البدور اللي نشدها من نشدها
جادل هزت عروش وخيبت روس ذهينه
قسمها في رسمها في جسمها اللافي رشدها
واسمها انجال الغضب قومه على الا لسن رطينه
أترك الناي وعطيت شيخنا غنى لسعدها
وانبسط يا عم وانسى اللي ورى التربه دفينه
قلت ولصدري تناهيد تروع من شهدها
آآه وا ويلاه من يجلب على قلبي ضنينه
خلوا اغلى ذاهبه ترعى ربيع اللي فقدها
والعطا راعيه محدن صوبه الله لا يهينه
لو ضمنت الجنه و تفاحة القلب وشهدها
قلت من بكره عسى مجنونها تاقف سنينه