.. أمير الحب ..
يا سيدي سبحان من صور
وجـهك يـا بـو الأكــبــر
كل ما أشوف الشمس أتذكر
وجـهـك يا بـو الأكـــبـر
سبحان من صور - وجهك يا بو الأكبر
****
جل من كون صفاتك وإنت قرآن المعاني
حبك ايطهر وجودي ذكرك ايطهر لساني
كعبة العشاگ إنت هايم ابحبك تراني
يل خذت من عندي گلبي امنين أجيبن گلب ثاني
يل بيك إنشراحي
وابحلي او رواحي
آنه ابشوگي صاحي
من ليلي إلصباحي
مثل البدر يظهر
وجهك يا بو الأكبر
****
هذه أثواب الملاحة الباري فصلها اعلى گدك
رسم آيات الجمال الطاهر ابقرآن خدك
يا أمير الحب ترفق باليحبك وإليودك
شيمة الأسياد ترحم بالعبيد وآنه عبدك
إرحم جفن غافي
بأحضان المنافي
ما أگدر أوافي
وصفك بالقوافي
يسطع مثل حيدر
وجه يا بو الأكبر
****
إنت ألوان الحياة او تنرسم بيك الطبيعة
لو خريف الدنية يعصف إنت للعاشگ ربيعه
ودعتك عندك حياتي او مهجتي يا إبن الوديعة
حبك ابروحي إشتريته ابيا ثمن حبك أبيعه
حبيتك هويتك
ما لحظة نسيتك
برموشي خفيتك
وابعمري إشتريتك
أثمن من الجوهر
وجهك يا بو الأكبر
****
شمعة ذوبني هواك ابنار أشواگي او غرامي
صبري عالحب صبر شاعر وإنت محبوبي او إمامي
العيد وجهك والهلال الحاجب إليختم صيامي
عايش اويايه ابركوعي وابسجودي وابقيامي
محتاج إلحنينك
إلنفحة ياسمينك
نور الله يزينك
والدنية ابيمينك
وإلكل حسن مصدر
وجهك يا بو الأكبر