أحـنّ لك حتى ولو كنت موجــــــود
واشتــاق لــك حتّــى لـــو انّك قبالي
في غيبتك كنّي على العيش محـدود
عايش بوسط الناس لكــــن لحـــالي
ما به حـــلا في دنيتي كان مفقــــود
ما دامني جنبك تـــرى المـــرّ حالي
ضحكتك انا من دونهــا مالي وجود
ضحكتك أغليها مثل ما انت غـــالي
هديّتي لك خافقـي ما هــــــي ورود
ما دام قلبك أسـكنـه لـــي لحــــالــي
يا حلو طبعك عادتك دايـــم تجــــود
عطيتنــي قلبك ملكتــه حــــــلالـــي
يوم ٍ عـرفــتك توّني فيه مــــولـــود
واللّي قبل بانســاه ماضي مضى لي
الحـظّ لو قصّــر معــــي انت بتزود
ما هــمّنــي حـظّـــــي لأنك مـنـالـي
ما منك عيبة لا حشـى انت لي زود
أمـــوت بك واهـــواك يا راس مالي
خالي مكانك والحــــزن فيه موعود
مع غيبتك رويت لك مــا جــرى لي
يا جعل ما قد راح ما لحظـــة يعود
حتى ولو عـــاقــــل غيابك هـبـالــي
ما عاد ابي فرقاك يا ناعـــــم العود
في غيبتك متســـاويـــة مـا أبـالــــي
بالمختصر موجود ما دمت موجود
وان غبت كلّ الهـــــمّ جـالـس قبالي