[عـازف الآهـات]

رجعتي بعـد ماطـوّل غيابـك والبطـا قتّـال
حبيبـك أنهكـه هـذا الغيـاب وهدّلـه حيلـه
أنا لو جيت أبوصف لك شعوري صعب ماينقـال
أدوّر في غيابك للأمـل والصبـر أي حِيلـه !!
غيابك لعن أبو حيّه أحسّه قـد تمـادى وطـال
ذبحني والمصيبه ياغلاتي كان : بس ليلـه !!
شسوّيلك وأنا عاشق يبي حـب ورواقـة بـال
شسوّي لك وقلبي هو بعـد مـدري شسوّي لـه !!
غيابك مثل طعنـات الزمـان وموتـة الآمـال
مثل ما للزمن ميلـه بقلبـي لـك بعـد ميلـه
تركتيني وأنا واقـف وفينـي منكسـر رجّـال
رفض دمعه يطيح ومارفض قلبـك ومنديلـه !!
تمنى وقته أنّك ماتشوفـي دمـع عينـه سـال
كثر ماهو تمنّى ألتفاتـة قلـب يومـي لـه !!
ينادي قلبه وفمّه رفض صوته على كـل حـال
أياويله من الصمت ومن الشكـوى أياويلـه !!
دروبه كلهـا هـم وتعـب وأقـداره الترحـال
رضخ للواقع وحلمه مثل حمله وش يشيلـه ؟؟
يبي منك القليل وللأسف كـان القليـل أهمـال
إذا قلبك وهو قلبك نسى .. وش عاد باقي له ؟؟