 |
 |
 |
|
|
|
|
|
|
#1
03-31-2012, 08:51 PM
|
|||
|
|||
|
ياتركي جفت دمعة العين لرضاك
واليوم طاحت فوق غترتك وثوبي ) ... السلام عليكم ورحمة الله وبركاته : أترككم مع القصة ............ تركي كان اعز اصدقائي من عائله غنيه وابوه معروف في اسواق الأسهم بالهامور عكسي تمامآ انا من عائله فقيره ووحيد امي وابوي الي اعرفه عن ابوي انه من عائله كبيره تعيش بالرياض وهو على خلافات مع اخوانه وسبب انتقالنا للقصيم هالخلافات .. درست مع تركي جميع المراحل كان كل وقتي معه كان الأخو الوحيد لي تعلقت فيه من ذاك اليوم .. انتم عارفين حال الطلاب بأول يوم لهم بالمدرسه بعضهم الدمعه على رمش العين وبعضهم يسوي روحه قوي ومايهمن إذا ابوي راح بالنسبه لي خواف من الدرجه الأولى وخاصه اني متعود مااروح مكان الاوابوي معي المهم كنت واقف عند باب الفصل واتلفت يمين ويسار انتظر ابوي يرجع وبعيد عني فيه شله اولاد معهم واحد طويل واسمر باين عليه ولد عز كان متسيد الكلام وواضح ان الكل يخاف منه شافني واقف وجاء عندي واناجاك الموت ياتارك الصلاة _ لوسمحت # نعم ... (استغربت من اسلوبه كان بقمة الأدب ) _ انت بأول # ايه وانت (سويت فيهاجريء) _ انابعد بأول وين جلست #هناك _ يعني جنبي #( ياولد طلع جنبي) _ وش فيك واقف لحالك # مااعرف احد هنا _ تعال انابعرفك على الشباب # (اناماصدقت خبر ) وكأن هالشخص نازل علي من السماء _ ماقلتي وش اسمك #انا سالم _وانا تركي شباب تعالوا بعرفكم على صديقي هذا سالم من اليوم ورايح واحد منكم .. كان اول يوم اعرف تركي الي مع الأيام ملك كل اخلاصي صحيح انه قوي وله هيبه لكني فاهمه شخص طيب خلوق لكنه يكابر مرت السنين بسرعه وحب تركي يزيد بقلبي اصبح شريكي بذكرياتي ووقتي واهلي كانوا الشباب في المدرسه وخاصه بالثانوي دايمآ يعايرون تركي بأنه يمشي مع ولد من الطبقات الفقيره وكان كلامهم يجرحني _ سالم لايهمك كلامهم الشخص بأخلاقه مو بجيبه وكم يملك هذا شباب طايش ماللأخلاق اي نصيب من تفكيرهم # ادري ياتركي بس _ لابس ولاشي تعال خلنا نجلس هنا وماعلي منك انامفلس مابجيبي ريال روح وجيبلي كاس حليب وسندوتش فلافل خلني اعبي بطني قبل ماادخل الفصل لأن عقلي يتقفل إذا ماأكلت (كان هذا اسلوب تركي من عرفته يقلب الموضيع لمزح على شان ينسيني) #هاها هاها وانا وش دخلني فيك يالدب اصرف عليك بس خلاص ابرحمك هالمره واشريلك على حسابي والمره الثانيه عليك _اهووو عاد بيذلنا تراها 3 ريال يازطي # هاهاها تفداك الملاين يالغالي _ اجل خلها فلافل وجبن هاهاها بالرغم الأختلاف الكبير بيني وبين تركي كان كل واحد فينا معجب بشخصية الثاني ويمكن هالشي سبب من الأسباب الي قوة علاقتنا كنا نحترم اراء بعض ومايفكر واحد منا يجرح اويخطي على الثاني وكل هذا تعلمته من قدوتي وصديقي واغلا الناس عندي (تركي) .. اذكر يوم من الايام وإذا ماخاب ضني بايام الاجازه كنت نايم متاخر وتعبان مره وكان تركي هوايته المفضله بإزعاجي تقريبا الساعه 1:30 كان جوالي يدق .. # الوا .. _ صباح الحب وانغامه صباح العشق واحساسه صباح ثويلم واخوانه # هاهاهاهاها الله ياخذ بليسك مانسيت ؟ _ لامانسيت قوم يالله تأخرنا على الشباب #اي شباب _ وش فيك نسيت اليوم نبي نروح لعنيزه بس ياتركي انت تدري بالحال اناماعندي سيارة _ وش فيك يالغالي سيارتي تفداك حتى لوعندك والله ماتدعس وانا موجود # تسلم يالغالي اجل نص ساعه واصير جاهز .. كنت اشيل بقلبي مشاعر صادقه لهذا الانسان ماقدرت ادفنها في قلبي انسان بنى الثقة بالنفس والاحترام والاخلاق في حياتي لو اوصفه بألاف العبارات ماتوفي هالشخص حقه .. من عرفت تركي ماخطر في بالي يجي يوم ونفترق او نتخلى عن بعض .. لحد ماجاء هاليوم الي فيه انصدمت بأغلا واعز انسان عندي ......... ------------------------------------------------------------------------------- راح يوم كامل ماشفت تركي ولاسمعت صوته وقررت ادق واشوف وينه فيه وكنت مسجله اسمه بجوالي "الغالي" #الوآ _ نعم # هلا تركي وينك مختفي اليوم _ عندي شغل ولازم اخلصه (كان يتكلم وكأنه يتكلم مع شخص ثقيل على قلبه) # على راحتك يالغالي إذا احتجت اي مساعده اناموجود _ لا مشكور مع السلامه وقطع الخط حسيت وكأني ضايع ابي افهم مين هالشخص مستحيل يكون اخوي تركي لامستحيل اي شغل هذا الي انا ماادري عنه اكيد اناغلطت بالرقم اكيد رجعت ودقيت عليه # الوا تركي ابي اشوفك الحين الوآ الوآ تركي رد علي وشفيك ساكت _ وقطع الخط _ مر يومين وانا ماذقت النوم واحس راسي راح ينفجر من التفكير اتمنى اشوف لكن فيه شي يمنعني وش صار ياتركي وش صار يااخوي ياقدوتي _ _سالم ياوليدي اسويلك شي تاكله ماذقت شي من يومين # لايمه والله مالي نفس _ وش فيك ياوليد والله حالك مايرضي العدو (آه يايمه حالي ارضى تركي كيف مايرضي العدوا) # مافيه شي يمه بس تعبان شوي _ تركي فيه شي (وقفت كل الكلمات على لساني واخنقتني العبره) انفلبت على جنبي الثاني # لايمه تركي مافيه شي خليني انام شوي طلعت امي وجلست اتذكر ذيك الأيام _ سالم كتبت المسائل اللي في الكيمياء # ايه _ عطني دفترك بسرعه # مايحتاج يالكسول انا كتبتها لك _ متى # بدرس التوحيد يوم كنت نايم _كفوا يالغالي # هذا الي انت شاطر الكلام والنوم _ ونسيت الاكل ياثلوم هاهاهاها #على طاري الاكل وشرايك تجي اليوم تتغداء عندي _ خلني افكر واشوف يمكن ارحمك # هاهاها وإذا قلتلك ان الوالده مسويه اليوم مندي تاكل اصابيعك وراه _ خلاص موافق على شانك بس هاهاها #على شاني وعلشان المندي هاهاها .. نزلت دمعه من عيني بعد ماتذكرت هالايام حسيت ان هالدمعه الصغيره تحمل الم كبيييير مااقدر اتحمله لحالي تذكر ذاك الموقف يوم جاني تركي وكنت متضايق _ سالم احد من الشباب مضايقك # لا _ امك فيها شي # لا _ وش فيك يالغالي تكلم والله خوفتني عليك #ابوي تعبان ياتركي (ونزلت دموعي وصحت كانت هذي اول واخر مره اصيح من يوم عرفته واليوم صحت بسببه) _ عسى ماشر وش فيه # جلطه _لاحول ولاقوة الابالله ( سكت شوي ورفع راسه) _ سالم تصدق انا ماشفت ابوي من شهر ماادري اذا عايش او ميت ( استغربت من كلامه اناعارف كل شي وش قصده ) مر اسبوعين وللأسف حالي كل يوم اسوأ من الثاني دخلت المستشفى وإحتار الاطباء بحالتي كنت جسد بلاروح مااقدر احرك اصبع واحد واللي يشوفني يحسبني ميت _ كنت ماحس بالي حولي .. تحسن حالي من المغذيات بعد فضل الله وكتبولي خروج كنت متوقعه يجيني يقول الحمدلله على سلامتك ولكن ؟؟ قررت انهي هالكبرياء اللي بيننا و اروح لبيته واواجهه لازم اعرف الذنب الي سويته وهذا جزائه دقيت الجرس وطلع وليد اخو تركي الصغير # السلام عليكم _ وعليكم السلام # اخبارك وليد واخبار الاهل ان شاء الله بخير _ الحمدلله تسرك الحال تفظل # تسلم الله يزيد فظلك بس تركي _ ت ت تركي # وليد تركي فيه شي _ لابس تركي مسافر # وشلون مسافر وسيارته فيه _مسافر بالطياره #ليه ماقالي _ طلع فهد اخو تركي الكبير _ هلا والله بسالم منور البيت تفظل # فهد تركي وينه ؟!_ _مايصير نتكلم عند الباب تفظل # دخلت وأول شي شفته سيكل صغير بزاوية الحوش .. تذكرت ذاك اليوم .. (_شوف انادوره وانت دوره #خلاص بس احلف ماتدعس وتجحدني _ والله مااجحدك بس دفني وادفك) كان تركي ينقهر مني لاني اسرع منه "آآآآآآه ياذيك الأيام.. دخلنا المجلس وقبل مااجلس # فهد يرحم والديك تركي وش فيه ؟! _ مافيه الا الخير ان شاء الله اجلس وانا اقولك كل شي صار # قول انااسمعك _ قبل اسبوعين مرض تركي فجأه ودخل بغيبوبه والحمدلله صحا منها قبل يومين والحين حالت احسن بكثير لكنه مايتكلم # والحين وينه؟! _ في غرفته #ابي اشوفه !!!!!!!!!!!! _ بس # قلتلك ابي اشوفه _ زين تعال معي (دخلت غرفت تركي وخنقتني العبره ووقفت كل نبضات قلبي كان ممدد فوق السرير والاجهزه حوله وواقف جنبه دكتور ماسك يده ويناظر الساعه قربت منه وجلست على سريره ومسحت بيدي جبهته ) #تركي.... تركي.. اناسالم رد علي وش فيك حاس بشي يعورك شي رد علي يالغالي حطيت راسي على صدره ونفجر بديت اصيح حسيت اني طفل صغير # تركي رد علي ليه سويت كذا ليه ياتركي اناوش سوت عشان تبعد قولي ياتركي ليه (رفعت راسي اكلم فهد ... #ليه ماقلتولي ليه انا سالم انا اخوه انا صديقه انا اغلا انسان عنده (نزل فهد راسه ) # رد علي ليه ماقلتولي هو محتاجني الحين _ ب ب بس هو طلب مني مااقولك # (تغيرت نبرت صوتي) ... ليه _ماادري بس قالي لو تدهورت حالتي لايدري سالم ماابيه يتضايق وبعده بيوم دخل بغيبوبه (ماتبي اتضايق ياتركي انت ذبحتني ماضايقتني) جلست عند تركي وكنت انتظره يصحى في بالي اسئله كثير ودي اسأله .. ليه تغير مره وحده كذا ؟ ليه ماقالي وش الخطا الي سويته ليه راح وتركني بحيرتي راحت ثلاث ساعات وانا جالس بجنبه واتامل وجهه واضح انه تعبان كان العرق ينزل من جبهته ويتنفس بصعوبه واناجالس جنبه ومابيدي حل .. اصحى ياتركي تعب وانا انتظر هاليوم ريحني والله تعبت .. سمعت تركي ينطق كلمات غريبه عجزت اجمعها مع بعض كان صوته ثقيل والتعب غالب عليه .. كان يقول : لا انت تكذب ناصر قول قول هم يكذبون .. حاولت اصحيه # تركي تركي ( لكن مارد علي) بعد ساعه تقريبا فتح تركي عيونه وكنت جنبه #تركي الحمدلله على سلامتك اول ماشافني عصب وتغيرت نظراته لي انت وش تسوي هنا انصدمت من ردت فعله انا انا .. # تركي اناسالم صديقك _هذاك اول اتركني الحين اطلع من حياتي ابي انساك (كان تعبان ويتكلم بصعوبه خفت عليه ومافكرت بكلامه ) # خلاص ياتركي لاتتكلم انت تعبان تكفى ارتاح دخل فهد ووليد وكان الدكتور معهم _ ابعدوه عني ماابي اشوفه شالوني فهد ووليد من عنده وماحاولت اعترض او اقاوم كنت اناظره لحد ماوصلت الباب سكر وليد الباب _ ماادري وش اقولك ياسالم بس كنت منصدم من تركي مشيت وتركت فهد وهو يتكلم طلعت من بيتهم ووانا محتار وش صار ماتوقت اشوف تركي بهالحاله واسمعه منه هالكلام ضاقت بي الدنيا ماادري وين اروح سمعت اذان الفجر رحت للمسجد وصليت جماعه وسحبت مصحف من بين الرفوف وقريت كم سوره وسكرت القراءن .. رجعت للبيت وكان شكلي فعلا يخوف كان شماغي على كتفي وازارير ثوبي كلها مفتوحه لقيت امي جالسه تتظرني بالحوش ماقدرت تنام وانا مارجعت .. _سالم وينك ياوليدي تأخرت # اسف يمه نسيت اقولك _وشفيك متضارب مع احد # لايمه بس تعبان _ ياوليدي حرام عليك احرقت قلبي قولي وشفيك هالايام # مافيني شي بس جهزيلي شنطتي بكرى ابروح لمكه اعتمر _ بتروح لحالك # ايه _وتركي # لاتركي مسافر مع اهله ... "(حجزت مع النقل الجماعي كان ودي اروح لمكه واجلس مع نفسي شوي يمكن افهم الي صار كنت طول الطريق افكر بحالة تركي اخاف انه تعب زياده وادعي لله انه يشفيه)" .. وصلنا الميقات واول مانزلت تذكرت يوم جينا اناوتركي قبل سنتين .. #هاهاها وشفيك تمشي كذا _ سالم ضف وجهك تراها واصله معي # الله يقطع بليسك _ ماابي اعتمر خلاص هونت # ليه _ يااخي افهم ماتعودت امشي بدون سروال # كانوا كل اللي يسمعونه يضحكون عليه لبست حرامي وصليت ركعتين ونويت العمره وصلت مكه الساعه 3 م وسكنت في شركة مكه تبع النقل وكنت تعبان لكن عندي رغبه كبيره اني اروح للحرم اول مانزلت من الشركه كان قدامي باب الملك عبدالعزيز دخلت للحرم كانت اجواء روحنيه ماتوصف طفت وسعيت طلع من باب الصفا ورحت لصالون حلاقه كان تحت اسواق الليل ( تذكر يوم رحنا انا وتركي وحلقه الهندي صفر كان شكله يضحك ) بعد ماخلصت اذن الفجر رجعت للحرم وصليت وكان الامام الشيخ سعود الشريم كانت تلاوته رائعه خشعت معه حسي اني نسيت روحي رجعت للشقه وانسدحت بنام .. انعادت كل احداث امس قدام عيني حالت تركي ونظرته لي ونبرت الغضب بصوته كل ماتذكرت هالاشياء تجمعت الدموع بعيني كان ودي اعرف حالته الحين تحسنت اولا لكن كرامتي وكبريائي يمنعوني ادق عليه واسأله ,, حسيت ان الجوع بيذبحني نزلت للمطعم وطلبت وجبه وجلست على الطاوله وكنت اقراء رساله قديمه من تركي .. ان كنت ادور يا حياتي على ارضاك وازعـل اللـي يالغـلا يزعلـونـك وان كنت احب ومقدر احب لـولاك وشلون اخونك لعنبـو مـن يخونـك عذبت روحي يا منى الـروح ويـاك وحبيت من حبـك حبيبـي طعونـك تنفست بعمق وحسيت بألم كبير في صدري رفعت راسي وشفت واحد مو غريب كان يصد عني عرفته كان ناصر تذكرت كلام تركي (لا انت تكذب ناصر قول قول هم يكذبون ) ماكان تركي يعرف احد اسمه بهالاسم غير ناصر قمت وسلمت عليه # هلاناصركيف الحال _ هلاااا سالم تسرك الحال وش اخبارك انت والاهل ان شاء الله بخير # الحمدلله كلهم بخير اشوفك لحالك مع مين جاي _ والله جيت مع الوالد بيعتمر ونرجع للقصيم وانت جاي لحالك #ايه جيت مع النقل اسبوع واناراجع ان شاء الله _ غريبه وتركي وينه مو عوايدكم تروحون مكان الامع بعض # لاتركي تعبان شوي _لالاسلامات مايشوف شر # الشر مايجيك يارب تفضل تعشى معي _ الله يزيد فضلك بس الوالد ينتظرني ومااقدر اتاخر عليه اخاف يحتاجني # على راحتك خلنا نشوفك مع السلامه _ الله يسلمك راح ثلاث ايام وانا بمكه كنت احس بالملل لوكان تركي معي كان كل شي غير آآآآآآه ياتركي وش هالحيره اللي رميتها في قلبي .. الساعه 2م دق الجرس واستغربت مين جاي في هالوقت وش يبغي فتحت الباب و انصدمت ......كان ناصر # هلا ناصر تفضل حياك الله _ الله يحيك # عسى ماشر فيه شي الوالد صايرله شي _ لاالحمد لله كلنا بخير بس مليت وانا لحالي قلت اجي اسهر عندك # هذي الساعه المباركه _ الله يبارك بايامك بصراحه ياسالم امس دقيت على تركي خفت لايكون فيه شي وان مخبي علي # دقيت عليه _ايه # وش اخباره تعبان _ لاالحمدلله كان مبسوط ويضحك (تضحك ياتركي وانا احترق من أسبابك ليه بس المهم انك مرتاح اخيرا تطمنت عليك يالغالي ) ........ رجعت للقصيم وراح تقريبا اسبوع كامل وانا مااعرف عن تركي اي خبر ماكنت اطلع من البيت ال اللمسجد نزل وزني وصرت جلد وعظم ماكنت ارتاح في نومي كنت اسهر الليل وانا اتذكر الايام اللي راحت وانا مع تركي وافكر وش غيره !!!!!!!!!!!!! تركي عقله كبير وفاهم كل شي معقوله سامع كلام عني او احد قايله شي لامااتوقع مستحيل يصدق .. كنت مستغرب من ناصر اللي يوم بعد يوم تكثر زياراته لي انا ماكنت اهضمه لان تركي كان يكرهه وانا متعود اللي تركي يكرهه انا اكرهه كان بعض الاحيان يخطي على تركي لكني ما اسكتله ,, في يوم من لايام كنت نايم وحلمت اني في صحراء كبيره وجاني شخص وعطاني كاس فاضي وجاني تركي واخذ الكاس مني قطع حلمي امي اللي صحتني _سالم ياوليدي قوم فيه رجال يبيك بالمجلس # ان شاء الله يمه _ كنت اقول في خاطري اكيد ناصر هذا مايستحي بكل ساعه جاي غسلت وجهي ولبست ونزت دخلت المجلس ........... انصدمت وقفت بوسط الباب وحسيت برعشه في جسمي حست ان كل اطرافي قاسيه ماقدرت احرك يديني او انطق حرف واحد كانت عيني على هالشخص اللي جالس في صدر المجلس معقوله انا احلم اكيد لا .......... كان !!! تــ ـــــ تـــ تركي ... وقف وكان يناظرني راحت خمس دقايق وحنا واقفين وكل واحد يناظر الثاني ... قرب مني .... وكنت خايف على الرغم من ثباتي كان تعبان وضاعف مره ووجه شاحب كلنا عشنا "العذاب نفسه" لكني ما اعرف السبب ... كنت اتمنى اشوفه واتكلم معه واسأله عن اللي صار لكن الحين تمنيت الارض ينشق وتبلعني ...................... ......... ..... .... .. ماتوقعت اني اشوف تركي بعد اللي صار وفي مجلس بيتنا بعد كنت موقن بأن علاقتي معه انتهت وللأبد .. حضني بقوه حسيت ان الدم وقف بعروقي كان يتكلم وهو يصيح _سالم والله العظيم انا اسف سامحني يالغالي .. كنت واقف وماحركت ساكن معقوله هذا تركي معقوله يصيح وين كبريائه وشصار وتغير كل شي فينا .. بعد عني ومسح دموعه .. _ سالم انا اخطيت في حقك وجرحتك وعيشتك بحيره وصدمتك باعز صديق عندك لكن والله هم السبب .. أبعدت عنه وجلست #تركي انا ماابي دموع ولااعتذار اللي ابيه شي واحد بس انا وش سويت ..؟! _ انا راح اقولك كل شي بس تسامحني .. تذكر ناصر اللي كان يطلع معنا بالاستراحه جاني مره وهو متضايق وكان واضح ان عنده كلام وده يقوله _ ناصر وش فيك - والله ياتركي ماادري وش اقولك _ قول وش فيك لاتخوفني - انت عارف صديقك سالم وين كان امس _ ايه كان طالع للإستراحه مع ربع ابوه - هذا اللي كنت متوقعه _ انت وش تتكلم عنه - بصراحه ياتركي سالم كان طالع للبر معنا وكان جالس يتكلم عنك _ لاسالم مستحيل يسويها انت تكذب - اناعارف انك بتكذبني لكن هذااللي صار كان يقول عنك انك انسان غبي وهو يمشي معك علشان تصرف عليه بس. _ اقول اسكت وقوم ضف وجهك عني يالحمار - لاتتعدا حدودك اناطالع بدون طرد لكن قبل مااطلع ودي تسمع شي - طلع جواله من جيبه ودق على واحد من الشباب كان متفق معه وفتح السبيكر - الو فهد كيف حالك _تمام اخبارك انت يانصور - الحمدلله بس ابي اسالك عن رايك في كلام سالم امس معقوله تركي ماحس فيه _ لااكيد ماحس سالم هذا حيه واللي يقرصه يموت وقطع الخط سمعت ياتركي هذا سالم صديقك اللي الحين طردتني علشانه مع السلامه .. وبعدها دقيت انت علي #الوآ _ نعم # هلا تركي وينك مختفي اليوم _ عندي شغل ولازم اخلصه # على راحتك يالغالي إذا احتجت اي مساعده اناموجود _ لا مشكور مع السلامه ( وقطعت الخط وبعد ثواني دقيت على وكنت منصدم من كلام ناصر وعجزت اتكلم) #الوا تركي ابي اشوفك الحين الوآ الوآ تركي رد علي وشفيك ساكت ( وقطعت الخط) _ بعد اسبوعين دق علي ناصر وقالي انك سافرت للإمارات وهذا اللي اكدلي كلامه تعبت من التفكير بكلامهم ووصيت اخوي فهد مايقولك اي شي عني علشان ماتتضايق وانت مسافر كنت حاس بشعور غريب في قلبي يكذب كلامهم دخلت بغيبوبه لمدة اسبوعين وبعدها صحيت وسالت عنك وقالي فهد انك مسافر كان خايف يقولي انك ماجيتني تعبت زياده كنت احسبك مسافر ولاهمك اذا انا بخير او لا لحد ماجاء ذاك اليوم اللي صحيت وانت جالس عندي .. وبعد كم يوم شفت ولد عمي واللي كان دكتور في المستشفى وقالي انك دخلت المستشفى في نفس الوقت اللي كنت احسبك مسافر واكتشفت ان هالحقير ناصر كان يكذب علي جيت لبيتك وسألت امك عنك وقالتلي انك تعبان و رحت لمكه ترتاح شوي حجزت باول رحله بمكه وماخليت فندق الاوسألت فيه عنك لحد مالقيت اسمك لكن للأسف قالولي انك تركت الشقه .. ورجعت امس وكنت انتظر اذان الظهر علشان اجيلك هذ كل اللي صار ياسالم وبعدها نزل تركي راسه وهو يصيح ( تجمعت الدموع بعيني وحست اني توي افهم اللي صار انفجرت بالصياح وقمت ورفعت تركي من ثوبه ) # حرام عليك ياتركي تصدق كلام الناس مافكرت بالعشره اللي بيننا انت اكثر واحد عارف طبعي وشلون اسامحك انت عيشتني بعذاب ماكان يعلم فيه الاالله ( كان صوتي يعلى شوي شوي ) -------------------------------------------------------------------------------- # معقوله انا اطمع بفلوسك مو انت اللي علمتني ان الرجال بمعادنهم مو بجيوبهم قول تكلم تكلم (رد علي تركي بصوت اليم تمنيت اني ماسمعته) _ ايه ياسالم ...وسكت شوي... اناللي علمتك وانا للي علمتك بعد ماتصدق كلام الناس لكني اسف سامحني # اسامحك ياتركي ( وشديته من ثوبي ) قولي كيف اسامحك انااعتبرتك اخوي ... اخوي ياتركي ليه صدقت كلامهم ليـــ (وقاطعني) _خلاص ياسالم ( ورفع راسه وكانت نظراته نفسها النظرات اللي كان يناظرني فيها اول ماشفته بالمدرسه) .. تكفى ياسالم خلاص انااعترفلك اني اخطيت وجيتك واناعارف انك ماراح تغفرلي هالذنب لكني صديقك والشيطان اعماني ناصر لعب في عقلي .. رميت تركي في الارض وطلعت وانا مسرع وركبت سيارت ابوي ومشيت وكان تركي يمشي وراي ويحاول يوقفني لكني ماعبرته ودق على جوالي ومارديت كنت ناوي اروح للرس لاني اكيد راح القى ناصر بالاستراحه هناك في مدخل الرس وبالضبط في التقاطع الاول قطعت الاشاره وكان تركي وراي وفجاءه سمعت صوت صدمه قويه ضربت الفرامل ونزلت وماتتوقعون وش هالمصيبه اللي الله امتحني فيها .. اختلطت سيارت تركي بهيلوكس كانت مسرعه وماقدرت اميز بين زيت السيارات والدم اللي متناثر كان ابشع حادث شفته بحياتي وتخيلوا ان الحادث لأعز انسان في حياتي قربت من تركي اللي كان طايح على الارض وثوبه متقطع ولونه احمر ووجهه كله جروح وضربات كنت ارتجف ماقدرت اقف طحت على ركبتي ورفعت راسه #تركي تركي رد علي ( فتح تركي عيونه وتكلم بصعوبه وكأن فوق صدره جبل ) _ سالم سامحني وبعدها غمض عيونه كانو الشباب متجمعين علينا وكل واحد يصرخ _ لاتحركه خله على الارض _ ياناس نادو الاسعاف لكني ماحسيت بغير تركي كان عندي امل انه بيعيش شالو الاسعاف تركي للمستشفى العام وانا كنت وراهم بالسياره دخلوه غرفت العمليات وبعد نص ساعه طلع تركي .....!!!! لكن للأسف ماكان يمشي على رجليه او يتكلم كان ........... ممد على سرير ومغطينه بشرشف ابيض .... لا معقوله تركي مات كشفت الشرشف كانت اقول في خاطري اكيد يكذبون علي هذا راعي الهيلوكس تركي عايش انا تكلمت معه والله عايش .. لكن الموت اخذه صرخت بصوت عالي وحست ان العالم كلهم يسمعوني .. لااااا تركي لاتموت انتم كذابين ذبحتوا تركي اناتكلمت معه تركي مامااااات تركي ماماااااااااااات ومسكت الدكتور اللي كان يدف السرير مع صدره #ليه تذبح تركي تركي مامات ليه تذبحه . ابعدوني الموجودين عن الدكتور ورحت حضنت تركي لاتروح ياتركي والله تعذبت بدونك لاتروح كنت حاضنه والدم ينزل بين اصابعي واصيح .. جاء ابو تركي وفهد ومحمد ووليد اخوانه حاولو يبعدوني عنه لكني ماحسيت كان الحزن والالم ياكل قلبي .. بعد صلاة الظهر اخذو تركي للمغسله وكفنوه وانا جالس عند المستشفى ماتحركت جاني فهد _ سالم بعد صلاة العصر بندفن تركي ولازم تجي تودعه قبل لانحطه بين يدين ربه رفعت راسي وكانت عيوني مليانه دموع # يعني خلاص يافهد تركي مات _ تعوذ من الشيطان ياسالم هذا قضاء الله رجعت للبيت وبدلت ثوبي ورحت لمسجد الدهامي اللي كانو ا يصلون على الاموات فيه صليت العصر وطلعت للمقبره كنت شايل جنازة اعز مخلوق عرفته تخيلو قمة الالم اللي اعيشه رايح اسلم اغلى انسان للتراب والدود نزلت للقبر انا وفهد ونزلنا وفكيت العقد وكشفت وجهه - تركي سامحني انا السبب انا اللي جبتك للموت سامحني ياتركي ونزلت دموعي تمنيت ان الوقت يرجع واقوله اني مسامحك واخليه يرتاح لكن ؟؟؟؟؟ طلعنا من القبر ودفناه وراحوا كل الموجودين في المقبره وانا جلست عند قبر تركي ... كنت اتذكر كل شي صار من عرفته .. _سالم لو تموت تصيح او لا # اكيد لا ياتركي انا رجال ودمعتي ماتنزل _ حتى انا ماراح اصيح لو تموت بس بيضيق صدري # اصلا اذاكبرت وشريت سياره ماراح اسرع علشان مااصدم وتخرب سيارتي _لايالغبي انا إذا كبرت ماراح اسرع علشان مااموت كانت هالذكريات تمر قدام عيني وكأنها صارت امس "آآآه ياتركي ياليتي سامحتك كان ماصار اللي صار يمكن تقولون ان الموضوع مايستاهل" هالزعل لكن الاخلاص والوفاء الصادق بين الاصدقاء قلب مايجرحه غير الشك قطع ذكرياتي صوت شاب كان يبكي بكاء جزع قمت علشان اهديه ويوم قربت منه تفاجأة انه فهد صديق ناصر كان يصيح وما انتبه اني واقف جبنه #فهد .. فهد .. التفت وبعدماشافني وقف ومسح دموعه _ عظم الله اجرك ياسالم الله يصبرك على فراق تركي # جزاك الله خير والله يصبرك على فراق ...... - ماكنت اعرف مين اللي مايت من قرابة فهد كنت متوقع ابوه لانه كبير وتعبان لكنه قاطعني وقال بصوت حزين _يصبرني على فراق صديقي ناصر # لامستحيل اصدق معقوله ناصر وتركي في يوم واحد _وشفيك ياسالم اسكت شكلك مادريت اللي صدم تركي امس ناصر ومشيت وتركت فهد وانا منصدم من اللي صار معقوله جيت علشان اذبح ناصر ويصدم تركي انا غبي انا حمار انا حقير لييييييييييييييه.. طلعت من المقبره وركبت سيارتي و كنت امشي 20 وكلي حزن على فراق تركي وكنت افكر كيف اعيش بعده انامااقدر اتصرف بدونه وشلون .... وقطع اسإلتي ولدين بعمر الــ 9 سنين يمشون في الشارع وكل واحد معاه بيبسي وواحد يقول للثاني _لو اللحين يجي ارهابي ويخطفني تنقذني ضرب الثاني صدره وقال -افاعلي انا ثويلم ولد (فلان) والله للعنهم قاله الثاني _كفوا يالغالي قده وقدود وقفت السياره ونزلت .. #السلام عليكم - كلهم - وعليكم السلام # وش اسمك -اناثالم وهذا ناصر صديقي وولد جيراننا # والنعم والله حتى انااسمي سالم ياناصر انت تحب سالم -ايه احبه حتى اكثر من جاسم اخوي # وانت ياسالم تحب تركي (اخطيت في الاسم لاني تعودت على اسمي معه) اقصد ناصر - ايه ناثر صديقي ودايم يفزع معي .. ركبت السياره وجلست الدور في الشوارع ماابي ادخل البيت وكل شي فيه يذكرني بتركي لكن امي وابوي ازعجوني وهم يدقون علي كانوا خايفين يصيرلي شي رجعت للبيت ودخلت للمجلس وكانت ريحة الغالي وغترته اللي طاحت من خناقي الى الحين فيه جلست واخذت الغتره وشميتها ومسحت فيها الدموع اللي نزلت من عيني #هذا اللي بقالي منك يالغالي وينك الحين "محتاجلك ثويلم" محتاجلك كثييير سلمت على امي وابوي اللي كلهم عزوني بوفات تركي ورقيت لغرفتي لقيت ثوبي اللي كان كله دم تركي شلت الثوب بين يديني ودموعي تطيح عليه وتذكرت اخر كلام تركي امس (ايه ياسالم ...... اناللي علمتك واناللي علمتك بعد ماتصدق كلام الناس لكني اسف سامحني ) { ياتركـــي جفت دمعـــة العين لرضـــاك واليوم طاحـــت فوق غتـــــرتك وثوبـــــي }... ................................................. 
|
|
#2
04-19-2012, 05:44 PM
|
|||
|
|||
|
 رووووعه قصه مؤلمه بآالحيييل مشكووره يآالغآاليه
|
|
#3
04-26-2012, 11:15 PM
|
|||
|
|||
|
درامه روعه ومعبره وفيها حكمة
بالتوفيق لكم
|
 |
| مواقع النشر (المفضلة) |
| الكلمات الدلالية (Tags) |
| لرضاك, العين, تركي |
| الذين يشاهدون محتوى الموضوع الآن : 1 ( الأعضاء 0 والزوار 1) | |
| أدوات الموضوع | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| تعويض عامل تركي رفض تناول هامبورجر المطعم الذي يعمل به ! | غلآ ابوهاا | أخبار المجتمع | 1 | 03-29-2012 11:43 AM |
| موشح تركي (بعنوان اللهم صلي على سيدنا محمد) | سيهاتي. | المرئَيآت الإسلامَيةَ | 4 | 10-23-2010 07:32 PM |
| محشش يكتب قصه لمسلسل تركي... | حوريه انسيه | نكـــت وفـرفشه | 4 | 09-12-2010 01:39 PM |
| الاتصال الثالث للشيخ تركي ببرنامج مطارحات في العقيده قناة الكوثر | سيهاتي. | قسم اليوتيوب  |
5 | 09-02-2010 12:30 AM |
يا تركي جفت دمع العين لرضاك
